DAFIS (Datos da Actividade Física Saudable - Valoración da Condición Física para a Saúde), é unha ferramenta
elaborada ao abeiro do Plan Galicia Saudable, promovido pola Xunta de Galicia e coordinado pola Secretaría
Xeral para o Deporte, para facilitarlles aos profesionais do ámbito da actividade física e do deporte a valoración
da condición física dos seus alumnos/as, deportistas e da cidadanía en xeral, que participa de iniciativas vinculadas
á práctica de actividade física e deporte.
Galicia Saudable, no marco do Plan Proxecta da Consellería de Cultura, Educación e Ordenación Universitaria,
está implementando programas educativos, entre os que está DAFIS, entre o alumnado galego co obxectivo de fomentar que adquiran e consoliden unha
vida activa e saudable.
- Establecer unha metodoloxía común de implantación dos protocolos de valoración da condición física para a saúde nos centros educativos e a súa relación co Proxecto Deportivo de Centro.
- Valorar a condición física para a saúde do alumnado, analizando e compartindo os datos resultantes destes.
- Facilitar a adquisición das competencias e os coñecementos relacionados coa Educación para a Saúde, dun xeito más innovador e dinámico.
- Asegurar, a través da programación de actividades físicas complementarias que o alumnado incremente a cantidade diaria de actividade física de calidade dentro do currículo, cumprindo así os obxectivos mínimos propostos pola OMS, a UE e os gobernos do Estado e galego.